又買。家品@【日本城】&【JUSCO Living Plaza】

今日又繼續買家品呀~~

因為一次過邊買得晒丫~~
今次又買o左兩大袋o野喇...
水壺、米缸、拖鞋、碗碟隔水盤、牙簽、飲管...
拎到手軟呀...T^T"

傢俬駕到~

今日係傢俬送貨o既日子~

本來【軒琴居】張床同床褥約o左下晝(2-6pm)送o架嘛...
點知上晝打o黎問可唔可以而家送o黎...
我話約o左下晝o架嘛，我唔係幾時都有人o係度等o架...
最後約o左兩點...
好彩Kenneth都"鼠"到出去新屋收貨咋...

點知原本【IKEA】餐枱同櫃約o左夜晚(6-10pm)送貨...
但佢兩點幾打o黎問幾時可以送...
我話而家得唔得，因為咁o岩有人...
佢話梗係得啦~
所以又係提早o左...

結果一個下晝就送晒o黎，床同餐枱仲由送貨師傅安裝埋~
新屋終於有傢俬喇~
開始有屋企o既感覺呀~~^^

『囍』❤ 婚宴場地地圖咭@【咭片皇】

Happy Birthday to KENNETH

今日係Kenneth踏入三字頭o既大日子呀~~

祝佢...
工作順利~~
仲有...最重要o既就係...
聽晒我話~~
哇哈哈哈哈^0^v~

今年我地都冇特別為大家慶祝生日...
因為大家都忙於籌備9月o既大project~
連我咁鍾意慶祝o既人...
都唔想慶祝...
真係實在太攰喇...

買。家品@【JUSCO $10 Plaza Plus】

一個屋企除o左要有傢俬同電器之外~

當然仲有就係家品啦~~
雖然佢係d好細微o既o野，令人好容易忽略o左佢...
但係你冇o左佢都真係幾唔方便o架~~

【JUSCO $10 Plaza Plus】入面咩家品都有齊~
o係度可以一次過買齊想要o既o野~~^^
雖然哩間入面係有d唔止$10 o既產品，
不過我地只係揀$10 o既o野，
所以都只係用o左$90就買o左9樣o野喇~~呵呵~~
門口地氈、碟、牙膏牙刷座、漱口杯、窗簾杆、百潔布...

『囍』❤ 婚禮貼紙@【HAPPYWEDDING ♥ HAPPYGIFT】

我o既婚禮貼紙呀~~

好靚呀~~^^
諗住用o黎貼o係囍帖封、利是封&小禮物o既包裝上~

『囍』❤ 媽媽套裝&晚裝@【迎賓】

適逢今日係自己生日，所以就攞o左一日假期~

於是我就趁哩日假期同媽媽去試衫喇~

其實早前都有幫媽媽睇過下...
覺得【Charming Image】d款都幾好...
加上都有朋友o既媽媽o係o個度租...
於是就同爸爸媽媽一齊去...
不過...試完之後...大家都唔係幾滿意...
因為媽媽試完出o黎...
好似...一條"雞絲粉卷"/"炸兩"呀~~~哈哈^^
(因為媽媽肚腩大，所以冇腰位，咁樣就好似一塊布包住咁囉...)
最後我地都係冇幫襯...

正當苦惱之際...
就諗起Sally結婚時帶我去買伴娘裙o個間樓上舖【迎賓】，
因為Sally媽媽都o係o個度造一套&租一套晚裝~
媽媽去到試o左兩件之後就決定到喇~~
(早知一早o黎哩度啦...─.─")
搞掂o左晚裝之後，
媽媽想造一套早上著o既套裝...
於是就o係哩度揀布料造埋喇...
個款係佢自己諗，之後個姨姨幫佢畫o架...
唔知出o黎個款會唔會好"騎尼"呢...
就咁聽就覺得好怪囉...@_@"

哩度價錢都幾抵呀~~
因為扮晒街坊~~所以有街坊價~~
(媽媽仲同佢講價o添...真係當正自己係街坊咁...)
租晚裝$550-
造套裝$1,000-

Happy Birthday to ME ｡◕‿-✿

今年o既生日係我婚前最後一個單身o既生日呀~

今年仍然係以梁小姐o既身份過；
下年我就會有兩個身份喇~~~
梁小姐哩個身份係哩世都唔會變o既~
不過就多o左個"黃太"o既身份囉...

今年o既生日願望係...
希望婚禮順順利利~~

買。櫃&牆架@【IKEA】

今日收工又入沙田【IKEA】~

因為尋日度好晒新屋o既尺寸，仲畫埋圖o添...哈哈^^
已經諗好d o野大致上點擺喇~~
(要多謝Sammi & Frankie上o黎一齊諗同俾意見~Thanks~~)

其實之前已經睇o岩o左d櫃o架喇...
不過再去度多次尺寸...
費事買o左但擺唔落啦...

最後，我地買o左兩個三層抽屜櫃(一大一細)&一塊牆架~
本來Frankie過o黎幫手自取o架...(Thanks~~)
但原來都幾重...
所以都係要俾錢【IKEA】送貨呀...
而家可以join埋張餐枱 31/7 晚一齊送o黎呀~~^^

入伙禮物の一 ღ 餐枱@【IKEA】by Sally

當我地7月頭一搵到屋o既時候，好多朋友知道之後都話送入伙禮物or幫手搬屋~~

真係好感動~~
有咁多人關心我地~~

Sally睇到我o既spaces，就留言俾我...
佢話睇到張餐枱好o岩我地二人世界撐枱腳，打算送俾我做入伙禮物~~
等我地撐枱腳時會諗起佢哩個第三者~~
(放心~我會諗起你一家三口o添~~)
不過我睇過出面d餐枱其實都幾貴...
(都唔明點解一塊板加四隻腳要咁貴囉...@_@??)
加上佢自己都買o左屋，又要裝修又要買傢俬電器...
所以我唔想佢破費喇...
於是叫o左佢唔洗買喇~~得閒出開o黎探我就夠~~
佢同我講：「我同你冇計啦~」
聽到哩句說話真係好窩心呀!!!
仲有...佢話我唔要張餐枱o既話...
就會買d唔等洗o既o野俾我...=.="
於是，我就同佢講唔好買咁貴喇...
我之前o係【IKEA】睇到一張四人強化玻璃餐枱連埋四張櫈，都係六百蚊~
我地見平平地，都諗住自己買o黎用~~
Sally話就送哩張啦~~

前日Sally就打o黎約o左我今日一齊去沙田【IKEA】買喇~~
佢係第一個送入伙禮物俾我地o架~~
真係好多謝佢地一家三口呀~~^3^

油油工程順利完工喇~~

經過兩個星期段段續續咁努力油油，

今日終於順利完工喇~~
而家可以度尺寸買傢俬喇~~YEAH~~^^

交吉囍帖@【Joy’s Card】

今日一放工就即刻仆去尖東【御苑皇宴】攞吉帖喇...

我都要好多謝勞小姐~~
因為佢知我趕住要，所以佢上晝去o左3間分店同我湊夠130張吉帖...
仲有，本來酒樓只係俾120張帖我，
但我同勞小姐講想要多10張做士啤，
佢都好好俾埋我...
雖然對佢地o黎講10張唔算係咩數目，
但係有d話o左咁多就咁多，唔俾就真係1張都唔會俾多你o架嘛...
正所謂"俾係人情，唔俾係道理"~

攞o左吉帖之後，我就即刻趕去《金都》【Joy's Card】...
搞到身水身汗...好慘呀...T^T"
唉...算啦...
鬼叫自己衰o左咩...
唯有o係哩d時間追返啦!!!

由於帖封唔洗俾【Joy's Card】，
所以我可以拎返屋企，
印定d人名呀~~

哈利波特–混血王子的背叛 (Harry Potter and the Half-Blood Prince)

導演 ：大衛葉慈

演員 ：丹尼爾雷德克里夫
　　　 魯柏格林
　　　 愛瑪華森
　　　 瑪姬史密斯
　　　 海倫娜寶漢卡特
　　　 茱莉亞華茲
片種 ：科幻劇情
級數 ：
日期 ：2009年7月15日

佛地魔進一步在麻瓜及巫師的世界中施展他的魔爪，而霍格華茲亦再也不安全。哈利懷疑學校中有佛地魔的內鬼在作祟，但是鄧不利多則忙於讓他準備快將來臨的最後一戰。二人合力尋找打敗佛地魔的關鍵，而鄧不利多亦召集了他的舊戰友及同袍赫瑞司‧史拉轟教授，相信他掌握著重要的線索。而同時，學生們則受到不同敵人的襲擊，在校院內引發起很大的怨憤。哈利發覺自己跟丁．湯瑪斯一樣，愈來愈喜歡金妮。榮恩則成為了文妲．布朗的對象，但是他卻誤吃了羅咪．凡的愛情巧克力而中了她的魔法，這些都讓妙麗心生妒忌，但她卻把自己的感覺藏於心中。校園中只有一人沒有被情所困，他專心致至地要成功揚名，縱然是投靠黑暗的勢力……雖然愛情正在他們中間慢慢滋長，但是亦有著悲劇他們面前等候著……霍格華茲將不會再如從前一樣……

買。床架&床褥@【軒琴居】

今日終於都買o左床架&床槈喇~~

我地o係【軒琴居】一次過買晒，
咁樣張床褥一定o岩個床架啦~~

床架我地買o左張油壓床，咁樣就可以多個超級迷你倉喇~~
有咩都可以塞晒入去~~
本來我想要白色o既床架o架...
不過，要等兩個星期先有貨...
加上仲貴三百幾蚊...
所以最後我地都係揀返原木色算喇...
一個星期即係 31/7 下午就可以送貨~

床褥我地就買o左隻"高回彈床褥"~
真係幾彈o架~
佢係一種新物料o黎o架，個感覺好似有彈簧o既床褥咁彈o架~~
都幾好瞓o架~~哈哈^^

囍帖對稿@【Joy's Card】

由於加錢做急件印帖o既原故，

所以今日就有得對稿喇...(正常要一個星期o架~)
本來佢叫我帶埋d吉帖俾佢o架...
因為佢地要將d帖上返廠做綁金色橡筋哩個程序，如果太遲就驚做唔切...

但係尋日...
我打去灣仔【新婚印像】問佢地攞吉帖，佢地話冇，酒樓先有現貨o既吉帖...
我打去【御苑皇宴】同勞小姐講我去攞吉帖，佢又話冇，叫我去返【新婚印像】攞就得...
於是今日...
我打去金都【新婚印像】問佢地攞吉帖，佢都係話冇，都係話去返酒樓攞...
我再打去【御苑皇宴】同勞小姐講我o既情況，叫佢幫我跟跟，究竟點樣...
(唉...真係俾佢地玩死呀!!!)
最後，勞小姐覆返我【新婚印像】要3個星期先起到貨...
我話我等唔到咁耐，因為我好趕...
於是佢話睇下其他分店有冇，夾埋湊夠咁多俾我...
(帖都要籌旗...真係慘...)
所以今日就冇帖攞去【Joy's Card】呀...
最快都要聽日下晝...

另外，對於家中排行方面有d疑惑，所以上網搵o左d資料睇下...
我一路都以為自己係"長女"o架，因為我最大丫嘛，對落有個細佬囉...
但原來係咁──

在喜帖內容、喜帖內文裡，新人名字之上一般都會加上他們在家中的排行，其實要留意的是，家中的兒子和女兒是分開計算的。以下是在一般情況下，在喜帖/結婚請帖上排行的寫法：

長男：家裡兒子排行最大
次男：家裡兒子排行第二
三男：家裡兒子排行第三
四男：家裡兒子排行第四
幼男：家裡兒子排行最小
小兒：家裡只有一位兒子
(家姐及細妹不計在內) 

長女：家裡女兒排行最大
次女：家裡女兒排行第二
三女：家裡女兒排行第三
四女：家裡女兒排行第四
幼女：家裡女兒排行最小
小女：家裡只有一位女兒
(哥哥及細佬不計在內)

印婚宴場地地圖咭@【咭片皇】

由於我地驚d賓客唔識去尖東【御苑皇宴】，

(其實真係好多人唔知o係邊o架，佢地連【帝苑酒店】o係邊都唔知...)
所以我地決定印地圖咭，
希望咁樣會好d啦...
但係我問過【御苑皇宴】有冇個地圖o既AI file，佢地話冇...
只有幾張之前派剩o既地圖咭...
於是我就攞張返去，睇下可以點搞...

平時公司印咭片or摺咭，都會搵【咭片皇】...
佢地都印得好快，3日就有貨交，就算印幾千張都好快~~
加上平時都係我負責訂哩d咭片o既，所以同佢地都幾熟~~
於是我幾個星期前已經scan o左張地圖咭俾佢地，
等佢地幫我做稿...
之後我都改o左幾十次，又咁又咁~~
(哈哈^^好麻煩o架我!!)
足足搞o左幾個星期~~
最後，我尋日終於confirm o左個稿喇~~
點知...佢今日就打o黎話做起o左...
可以去攞喇...
我聽到都呆o左...
真係快得好交關...@_@"

※我唔用普通o既230gsm啞膠咭，轉o左隻250gsm幻彩咭呀~
  唔知出o黎個效果點呢??靚唔靚呢??

『囍』❤ 囍帖@【新婚印像】X【Joy's Card】

囍帖都玩crossover??

經過星期一揀帖揀到發火事件之後...
我地決定o係【新婚印像】攞返酒樓d帖，(哼~佢咁衰，我唔會蝕俾佢o既~)
自己再攞出去印~

星期二同三我都問過其他舖頭...
出面o既印刷公司就快好多...
不過又唔知佢地印帖專唔專業，始終都好少印丫嘛...
有少少驚佢地個格式唔同/唔o岩...
而其他專門印帖o既公司就間間都係要咁耐...
起碼一個月先交貨...

最後我只係諗到加錢俾人當急件去印...
哩d錢係要俾人賺o既...
鬼叫自己"懞盛盛"咩...

於是今日再去《金都》搵其他公司印帖，費事再拖喇...
唔係有錢都做唔切呀...
最後我搵o左【Joy's Card】幫我印牛油紙o既內頁，
佢會將牛油紙連帖用金色橡筋箍好成份俾返我~
咁我就唔洗自己搞喇...
今日俾晒印內文o既資料佢，聽日要落去對稿&俾d吉帖佢；
確認冇問題之後就開始印...
由於我加o左急件費用...
所以8/8可以攞貨喇~~
※不過唔知【新婚印像】有冇現貨帖呢?!
  死嘞...有d擔心o添...

交《成長片》相片@【幸福宣言】

今日收工去o左太子，因為要去【幸福宣言】o既影樓交《成長片》o既相。

哩幾日睇返好多細個o既相...

唔搵都唔發覺...
原來我有好多BB至幼稚園o既相，但係就冇乜小學至中學o既相呀...
原因係o個時爸爸o既工作比以前辛苦o左好多，幾乎連放假o既時間都冇...
所以仲邊有時間帶我地去影相丫...

相反，Kenneth竟然一張BB時o既相都冇...
都唔知係搵唔到定真係冇呢...
而其餘每個時段都有一至兩張囉...
所以都冇咩選擇，但都總好過冇o既...

揀囍帖‧一肚火

話說酒樓送o既囍帖係要去【新婚印像】換領o既...

我地可以用返酒樓o既款，亦都可以自己揀同價或補差額o既款~

最後我地決定用返酒樓o既款，(因為佢本身個款都幾靚，唔老土~)
於是今日就打算去返【新婚印像】印帖...
但原來只係印內文o既價錢同自己揀款(包埋印內文)補差額o既價錢係差唔多...
咁不如揀一個自己鍾意o既款啦...
於是我就反轉人地間舖頭咁揀呀揀~~

終於俾我揀o左一款，同佢原本o既帖辦係有少少唔同...
原本佢地張帖前後o既圖案係唔同o既，但我見佢有客做過前後圖案一樣...
於是我就話要前後圖案一樣o個款...
點知佢話個款係個客加錢做過張菲林印o既...
如果我要改哩個款就要加$350菲林錢...
我覺得哩個收費好唔合理囉...
佢本身都有客做o左張菲林啦...點解仲要我加錢呀???
之後我叫個staff幫我問下佢公司，本身已經有菲林，可唔可以free俾我...
個staff都好好，真係有打電話幫我問...
不過答案都係唔得!!
由於收費好唔合理，所以條氣好唔順!!
火都o黎埋，頭頂出晒煙!!
最後冇幫襯就走人!!

唔通賺o左我哩$350，佢會發達?!
我一定唔會俾佢賺我哩$350~~
哼~睇佢點發達~~哈哈^^

※另外，原來印帖係要o係派帖前個幾月印o架...
   俾晒資料之後一個星期先有得對稿，
   確認o左個稿冇問題之後就開始印，
   印刷時間最少都要三個星期，甚至一個月...
   我地都係今日先知，但係已經太遲喇...
   問o左好多間，間間o既答案都係一樣...
   一定趕唔切過大禮前攞帖啦...仲要入帖喎...
   真係大鑊...@_@"

溫馨提示：仲有2個月就變師奶

油油工程進行中，請稍後…

上星期六新屋拜o左四角之後，我地就開始同新屋扮靚靚喇~~
其實只係油下油咁o者~
由於上手租客將全屋o既門油晒粉綠色...(真係唔係人人都鍾意...=.=")
所以我地決定將全屋o既門油返白色!!(至少正常d囉...)

所以今個星期，Kenneth下晝就去新屋油油...
主要係油全屋o既門...
不過...佢真係油得好慢呀...
點解??
因為佢買油油用o既掃...
咁細隻掃，咁大隻門，慢慢咁掃...真係天光油到天黑都搞唔掂呀...
所以佢油o左幾日都只係油到兩隻門連門框咁大把...
於是，今日我出動o左爸爸用o黎油油o既"碌碌"~~
嘩~~真係快成幾倍有多呀!!!
連我咁笨手笨腳o既人都好快油好兩隻門呀!!!
哈哈^^
但係門框d細微o既位，"碌碌"油唔到...
所以就留返俾Kenneth用掃油囉...
用"碌碌"油油真係快好多，又慳水慳力呀~

不過只係油一層油太薄喇...
所以我地仲要油多層...

希望哩個星期可以搞得掂啦~~
※油油工程尚未完工，同志仍需努力呀!!^^※

『莫拉菲』

天文台o係晚上11時30分發出o左2009年第一個8號風球 ──『莫拉菲』

可惜o係星期六晚上掛，所以對我o黎講都冇乜著數...

※特別風暴消息：天文台o係凌晨1時30分改發9號風球!!

滅蚤滅蟲大行動!!

今日o係新屋進行o左『滅蚤滅蟲大行動』!!

就係趁間屋咩都未有，所以滅一滅佢...
第時有傢俬電器時先做就好麻煩喇...
雖然眼見好似咩都冇咁，不過都係滅下佢穩陣d~

其實我地都係o係藥房買2個煙霧滅蚤滅蟲劑...
返去關閉所有門窗，按指示倒水o係個杯度，
之後放返o個個芯入去，好快佢就出煙喇...
見到佢出煙我地就走人lu~
等第日先返去收拾殘局~~呵呵^^

『囍』❤ 伴娘裙@【Red Wedding】

去新屋拜完四角之後，

我同Kenneth就馬不停蹄咁出去尖沙咀喇...
(午餐都冇食...)
因為約o左6點同Sammi去揀伴娘裙呀~
好彩佢同伴郎拍住拖咁等o者...唔係就悶死佢喇...
真係唔好意思...
因為約佢o既時候都唔知今日爸爸話係好日，會幫我地拜四角...
所以唯有推遲o左試衫o既時間囉...

YEAH~~
又K.O.多一樣o野喇~~
哈哈^^

拜四角

今日放o左工就同爸爸媽媽去o左新屋，

因為爸爸幫我地o係新屋拜四角，
等我地住得安心d~

聽日我地就可以開始清潔同執一執間屋...
之後就會去買傢俬同電器喇~~^^

※話說我地有四張大廈大堂入閘咭...
咁我打算俾一張爸爸，等佢得閒可以上o黎，
另一張就俾細佬，佢得閒都會上o黎hea/游水/過夜...
點知爸爸知我"論盡"，所以就叫我除o左張咭，另外配多套鎖匙擺o係佢度...
咁樣如果我唔記得帶鎖匙出街，都可以返爸爸度攞丫嘛~~
咁大個都仲要佢擔心o添...=_="
哈哈^^

My New DC ❤ Panasonic Lumix DMC-FS12 (Black)

哈哈~~

我終於有新DC用喇~~

部新DC係我今年第一份生日禮物呀!!
其實係之前細佬跌壞o左我部舊DC，
而家買o黎賠返俾我o者...
不過咩原因都好啦，總算有返DC用就得喇...
之前冇得用，真係幾唔方便...

強烈要求要買返Panasonic機呀~^^
一來用慣o左，二來質素好!!

『囍』❤ 【FranceBridal】婚紗相

收貨喇~收貨喇~

今日收到【FranceBridal】婚紗相喇~~^^


影返張大合照先~


要睇晒全部婚紗相，就請移玉步去"相簿"喇~↓
※照片含有驚嚇成份，可能會令大家情緒不安，希望唔會嚇親大家啦~~^^
(記得攞定嘔吐袋呀!!!)

http://cid-136cc46e7fb0396d.skydrive.live.com/browse.aspx/.res/136cc46e7fb0396d!2251?ct=photos

好o野~~【FranceBridal】婚紗相通知送貨喇~

好o野~~~

今日收到【FranceBridal】o既電話，通知聽日(7/7) 6:00pm-9:00pm 送貨呀~

其實都有d心理準備o架喇!!
因為本來原定↓
起貨日期：26/6/2009
送貨日期：6/7/2009
而家比預計日期遲o左一日，不過都好開心~~

ღ 安樂窩 ღ

由1/7開始，一連睇o左兩日屋喇...

估唔到係咁攰o架...
我地縮窄範圍，只係睇o左金禧花園、金獅花園同沙田中心...
金禧花園好近我屋企，不過真係勁貴...
金獅花園雖然都係大圍，不過就冇咁近我屋企，又冇咁方便...但租金平...
沙田中心離我屋企最遠，仲要搭車先到，不過以哩個地段o黎講，佢o既租金算平(咁o岩我地租o個間係咋..)，反而幾抵住...而且四周圍咩都有，勁方便...

其實原意一路都只係睇大圍o既o者...
同埋個心都諗定係租金獅花園o架喇...
因為哩區o黎講佢係最平o既...
不過咁o岩個agent話沙田中心有個租盤，租金都平，所以先去睇下之嘛...
最後我地當日都冇即時confirm...
第二日再去其他地產睇下其他金獅花園o既租盤...
睇完都係再考慮下...
到o左尋日先決定租沙田中心...
不過業主咁o岩唔得閒，所以今日先去地產度簽租約囉~
※Frankie足足陪o左我地三日呀...我諗佢都好攰...真係好多謝佢呀!!!

我地終於有個"安樂窩"喇~~
而家開始四圍物色傢俬同電器呀~~
(我唔介意各位朋友仔贊助o架~~細佬已經話o左送梳化俾我喇~~)
期待我地o既二人世界呀!!!^^
※你地得閒入開沙田行街，就o黎探下我啦~~我鍾意熱鬧同多d人陪我o架~~