嘩嘩嘩!!!【MONA LISA】婚紗相通知送貨喇~

嘩嘩嘩!!!

今日收到【MONA LISA】o既電話，通知下星期四(4/6) 6:00pm-9:00pm 送貨呀~

又會咁快都有o既?!真係好"突然"呀!!
本來原定↓
起貨日期：21/6/2009
送貨日期：1/7/2009
而家足足早o左大半個月呀~

心情既興奮又苦惱呀...
興奮就唔洗解釋啦~
苦惱就係因為冇地方擺呀...
本來以為會遲多過早o架嘛...
所以打算6月中/尾去租地方住，咁就可以夾到個送貨時間，d婚紗相就可以送去新屋丫嘛...
點知...
而家唯有送去我屋企擺住先啦...

※唔知【FranceBridal】o既婚紗相又會幾時送呢??好心急呀~~

試妝@【Triangel】

對上一次試妝已經係上年8月o既事喇...

但係o個次可以用失望o黎形容...
(由於o個次唔俾我地keep相，所以唔可以俾大家睇下我點解會咁失望...)
唉...算啦...都過o左去喇...

之後我就一直繼續搜尋其他合心意o既MUA，
但係好多都已經冇期喇...T_T
所以唯有搵d普普通通，而我又可以接受o既MUA囉...
於是，今日就去o左【Triangel】@百利搵CiCi試妝~
(其實我o係係網上見到有位新娘將2個MUA幫佢試妝o既相擺出o黎作比較，一個化到佢好似個阿嬸咁，相比之下，另一位就化得佢好young，真係一睇就已經高下立見!!於是我就諗住試下~)

我地好準時7:00pm去到~
一坐低我又攞我d『功課』出o黎...
之後就同佢講我要o既style係"YOUNG"~
一定唔要成熟同高貴，仲有唔要"Kelly髻"!!

褂妝 (妝&髮型照我要求)：
我俾張相佢睇個妝，我想試o既眼影顏色係粉紅色&青草綠色，
佢都有問我係咪要粉紅色&青草綠色，但係...唔知點解佢用o左粉紫色&青草綠色囉...
個髮型就set得一般，因為同我要求o既唔同...

但我最後都有同佢講，我覺得唔同...我都係想跟我要求o個個款...

晚妝 (佢參考o左我o既『功課』之後，妝同髮型都由MUA自由發揮)：
用o左隻銀藍色o既眼影，哩個可以接受，但最好就唔好用藍色系列啦...

今次就試o左2個髮型，2個都好鍾意呀~~好靚o架~
幾有驚喜~


Kenneth話哩個MUA至少有將我化靚o左(佢話連塊面都尖o左喎)，加上又化得我幾young~
同埋佢又真係了解我要咩style，而且亦造到合我心意o既髮型~
所以，我都唔再三心兩意喇...
同埋距離婚期唔係淨返好多時間，唔想再花時間繼續搵、繼續試...
於是我就落o左訂，book o左CiCi全日~
價錢好抵呀!!(全日都只係$4,380)
比起其他平好多~
佢仲包我伴娘同新郎化妝~(新郎我諗都係同佢gel下個頭o既o者...)
包頭飾、首飾、假髮 & 假眼睫毛...

『囍』❤ 幸福指環

我地對結婚戒指終於都到手喇~~Yeah~~^^

尋日收到【GUCCI】o既電話，話隻9號終於都o係機場send到尖沙咀分店喇~

可以去攞喇~
雖然今日橫風橫雨，但我仍然係抱住好興奮o既心情出去!!
攞o左對戒指，感覺好實在~~^^

小小血拼@【一田】購物優惠日

今日放工去o左【一田】拼一拼，拼o左少少o野返o黎~

戰利品：
1) 一套雙人床上用品：
　 床笠、枕頭袋、被套連被芯 (個款好得意呀!!留返結婚之後用^^)


2) 送俾昕昕o既衫衫：
　 兩件套裝 (粉紅色&粉黃色o個兩套，有埋褲仔好得意~) & 一件衫仔 (係Monchichi o架~)

溫馨提示：仲有4個月就變師奶

尋找無名指上o既小玩意

無名指上o既承諾，係一生一世o既...

而無名指上o既小玩意，亦都係一生一世o既...
所以我希望揀一對大家都鍾意o既...

我同Kenneth先後去過【周生生】、【PN 】& 【PINKBOX】，
每間我都有一對鍾意o既...
但係...好多時...
我鍾意，Kenneth唔鍾意；
又或者...
Kenneth鍾意，我唔鍾意...
仲未搵到一對大家都鍾意o既...
點算?!

我鍾意o個幾個款：
1) 【周生生 】- V & A Museum
V & A系列靈感源自維多利亞與亞伯特博物館典藏珠寶。來自日本的設計師在館內花了很長的時間研究古代飾物的設計和花紋，並以現代工藝重新演繹。大部份的V & A系列均有博物館編號。
哩對戒指有一句好有意思o既句子："My promise past, shall always last"
但係去分店睇過...
實物同張相都差幾遠...
o個句句子o既字好細隻，而且刻得冇咁深...所以其實真係唔多覺...
睇完之後好失望...


2) 【PN】
之前睇catalog有一對叫"In Love with You"o既戒指，
同我地而家戴o係尾指o個對係一模一樣o架~
所以就去睇下，不過女裝o個隻線條太幼喇...
我唔係太鍾意...


3) 【PINKBOX】
哩對就大家都有d鍾意，但唔係十分鍾意...


※最後，我地情歸 -【GUCCI】
事原係早幾日上網見到有人post o左一隻【GUCCI】o既戒指(只係普通戒指，但佢諗住買一對當係結婚戒指)，
個款好簡單，只係得一個圈咁，咩花款都冇...
睇張相都覺得OK，
於是尋日就同Kenneth去o左尖沙咀廣東道間【GUCCI】睇下有冇...
一入到去就搜尋d飾物，好快就搵到喇~~
於是就叫個staff攞俾我地睇...
就係佢喇~
之後就睇下有冇size先~
由於18K白金款冇我地size，所以個staff就攞o左18K金款o既size俾我地試...
最後試o岩o左(我係9號，Kenneth係16號)之後，
佢地就check其他shop有冇我地size...
好緊張呀!!!等o左一陣都未check到...
於是佢地就叫我留低電話，check完就覆我...
最後我就帶住緊張o既心情離開...
一路行，一路拎住個電話...
驚聽唔到電話響，驚miss o左個call...
大約等o左20分鐘左右，終於都收到【GUCCI】打o黎o既電話喇!!!
佢話confirm o左2個size都有呀!!!
Yeah~~超開心呀!!!
佢話有一隻聽日(即係今日)就會到，但另一隻要o係機場send出o黎，可能會耐d...
2隻到齊就會再call我~

今日又收到【GUCCI】o既電話，
佢話有一隻已經到o左喇~~
但由機場send出o黎o個隻就未到，預計要過多幾日，甚至要星期六先有...
所以佢會幫我keep起一隻先，等另外o個隻到埋先call我落去~
不過唔緊要啦~總之有就得喇~~呵呵~~
好期待呀~~^^

就係哩隻喇~~↓

⊱✿ 生日花語 ✿⊰

o係網上無意中睇到《生日花語》哩樣o野，於是就八八卦卦咁click入去睇下自己o既生日花...

七月二十九日

生日花︰矢車菊 (Black Knapweed)
花語︰遇見 (Encounter)
某些地方的少女，喜歡把摘下來的矢車菊壓平後放進內衣裡，經過一個小時之後，如果花瓣依然保持平坦、寬闊，那麼就表示將遇見自己未來的另一半。因此，它的花語是 —— 遇見。凡是受到這種花祝福而生的人，一輩子會遇見不少貴人︰如良師益友或者理想伴侶等。不知你自己是否也這樣認為呢﹖

睇完之後，真係覺得好準...
讀書o既時候，自己讀得好差...
但係身邊最熟o個班同學，讀書就好叻，總之有咩唔識都可以有人請教；
出o黎做o野o既時候，所做o既2份工，都係朋友介紹...
真係有唔少貴人呀~
至於，我係咪已經遇到理想伴侶哩方面...
就有待證實喇~~哈哈^^

如果你地有興趣的話，都可以click o黎睇下呀~~
一月　　http://www.fafatflower.com.hk/sample/days/jan.htm
二月　　http://www.fafatflower.com.hk/sample/days/feb.htm
三月　　http://www.fafatflower.com.hk/sample/days/mar.htm
四月　　http://www.fafatflower.com.hk/sample/days/apr.htm
五月　　http://www.fafatflower.com.hk/sample/days/may.htm
六月　　http://www.fafatflower.com.hk/sample/days/jun.htm
七月　　http://www.fafatflower.com.hk/sample/days/jul.htm
八月　　http://www.fafatflower.com.hk/sample/days/aug.htm
九月　　http://www.fafatflower.com.hk/sample/days/sep.htm
十月　　http://www.fafatflower.com.hk/sample/days/oct.htm
十一月　http://www.fafatflower.com.hk/sample/days/nov.htm
十二月　http://www.fafatflower.com.hk/sample/days/dec.htm

天使與魔鬼 (Angels & Demons)

導演 ：朗侯活

演員 ：湯漢斯
　　　 伊雲麥葵格
片種 ：劇情
級數 ：
日期 ：2009年5月14日

蘭頓無意中發現光照派這個歷史悠久的秘密組織竟死灰復燃，正進行著一項驚世大陰謀，他們為求目的甚至不惜殺人。同一時間，梵蒂岡亦收到「光照派」的死亡威脅。為阻止光照派的陰謀，蘭頓起程往羅馬，在那裡遇到美麗神秘的意大利科學家維特多莉亞‧維特勒及教皇內侍，三人遂聯手抽絲剝繭偵破謎團。蘭頓和維多莉亞必須與時間競賽，在二十四小時內勇闖密封的地窖、危機四伏的古墓、荒廢的教堂，甚至深入地球上最神秘的地下墓穴，追尋已有四百年歷史的四大古老符號——氣、土、火、水的踪跡，找出將炸毀整個梵蒂岡的「反物質」！

幸福‧龜苓膏

話說尋晚牙痛(其實都唔知係牙痛定係牙肉痛，只係知出智慧齒o個個位好痛...T^T)，

所以臨瞓前已經食定止痛藥...
但係凌晨4:25am就痛醒o左，痛o左好耐，o係張床度碌o左好耐...
都唔知痛到幾時先瞓返...痛下醒下咁...
今日起身都仲係咁痛，仲要痛到塊面同個頭都痛...(好慘...T^T)
加上尋晚瞓得唔好，所以就唔出街，o係屋企休息下...

其實本來諗住出街食龜苓膏睇下有冇幫忙...
但係最終都係選擇唔出喇...實在太辛苦喇...
不過Kenneth話過o黎買俾我食...
初初以為佢o係屋企直接搭巴士去大圍買【鴻福堂】/【養和堂】...
點知原來佢專登搭車去深水埗買【百寶堂】o既龜苓膏俾我，
佢話哩間o既龜苓膏最好，最見效~

其實對於其他人o黎講，可能哩件只係一件好普通、好平凡o既事...
但係對我o黎講，真係好特別...
因為Kenneth未試過咁做o架...
以前我唔舒服唔出街，佢通常都係叫我o係屋企休息下...
而佢都會留o係屋企唔出街，打下機...
但今日佢專登出街買龜苓膏，仲送上o黎屋企俾我，之後就返屋企...
我真係覺得佢改變o左...
變得緊張我同關心我...

雖然龜苓膏係甘甘苦苦咁，不過個心就好甜，好幸福呢~

Fruit Wine Cocktail with Yogurt

o係【嘉樂冰廳】食飽飽之後，我地就順道去o左【荃新天地】行下~

行過一間酒舖o既時候，就俾幾支色彩繽紛o既酒吸引住...
原來係幾支唔同味o既乳酪果汁酒...
見到入面有人試飲緊，於是我又走入去試下~~^^
試o左青蘋果，聞o既時候有乳酪味，但飲落去就冇...
仲好好味o添，一d酒味都冇!!
之後再試藍莓，聞o既時候係冇咩味o架，
但飲落去就好重黑加侖子味，都好好味呀~
最後試士多啤梨，聞o既時候好香好香...
但飲落去就冇咩果味...
佢仲有水蜜桃味，不過就冇開，所以冇得試lu...
試o左3種味，都係冇咩乳酪味，又冇苦苦o既酒味...
好o岩我飲，好鍾意呀~
加上我同Kenneth都覺得幾好飲，
而家佢又做特價$28/支 (原價$35/支)...
所以我地1人要1 pack (1 pack有4支，每隻味各1支)，即係買o左2 packs呀~~

Strawberry‧Peach‧Apple‧Blueberry

【嘉樂冰廳】

今日放o左工，同Kenneth兩條友都唔知去邊好...

於是就"即興"去o左荃灣^^
一來好耐冇行，二來想去試下網上好多人讚o既【嘉樂冰廳】~

去到o既時候已經排晒長龍喇...果然名不虛傳呀!!


等o左二十分鐘左右，終於有位喇~好o野~
當然梗係要叫佢最出名o既火腿奄列啦~
但見到佢個餐牌有"小火腿奄列"&"火腿奄列"2種，
我見小火腿奄列只係$16，火腿奄列就要$35...
於是我只係同阿姐講要火腿奄列，佢就同我寫o左小火腿奄列...
份奄列o黎到o既時候...
嘩...小火腿奄列都咁大份，咁火腿奄列貴一倍有多，唔知會有幾大份呢?!


仲有叫o左↓
鹵水豆腐 (d鹵水好入味呀!)


西多士 (好脆好香呀!)


凍好立克 (比普通餐廳o既大杯!)


兩個人食到飽飽，都只係$48~
好抵食呀~

地址：
荃灣新村街40B號地下

『囍』❤ 回禮小禮物@【Vanlily Chan】落訂

近幾年流行o係婚宴上送"回禮小禮物"，代表一對新人對來賓o既小小心意~~

而當我做伴娘、姊妹同賓客時，亦都見過唔少o既回禮禮物...
對我d咁為食o既小朋友o黎講，食得o既就梗係最好啦~~哈哈^^
可以o係開席前口痕o既時候食o左佢丫嘛~~
去過咁多次婚宴，都只係有兩次係唔食得o既小禮物...
有一次仲唔記得o左攞o添...
另一次o既小擺設拎o左返屋企之後都唔知塞o左去邊喇...

以我咁為食o既性格，我o既"回禮小禮物"當然會揀d食得o既o野啦~~哈哈^^
最初打算送玫瑰花形o既朱古力o架~~希望大家都甜甜蜜蜜丫嘛~~
但當我o係網上搵其他回禮禮物o既時候，就發現更多更特別o既甜點可以做回禮禮物...

o係網上睇到一個blog，見到blog主整o野食好叻~~
(連雜誌都搵佢做訪問教新人做一d DIY o既回禮禮物...)
睇過佢整o既甜點之後，真係好鍾意呀~~
於是就搵o左佢幫我做"回禮小禮物"喇~~

以下就係我幾款心水o既"回禮小禮物"喇~
樣樣都好鍾意~~唔知點揀好呀~~
(圖片copy from Vanlily's blog)

『囍』❤ 結婚證書冊

一個月前訂o既"結婚證書冊"終於有得攞喇~~Yeah~~

仲繡o左我同Kenneth個名&結婚日期o架!!^^

※由於相機俾細佬跌壞o左...所以影出o黎個效果好差呀...u_u