4月‧4天‧4圍去‧4圍食の旅

4日o既復活節假期放完喇...(唔想返工呀!!)

哩4日假期係繼農曆新年之後唯一一個長假...打後都冇喇...
所以好多人都去外地旅行，亦都有好多旅客o黎香港旅行~~
雖然我都好想去旅行玩下...
不過最後都係選擇留o係香港四圍去、四圍食~~^^

Day 1
買早餐【麥當當】& 買o左d韓國o野食 → 食完【麥當當】就hea → hea到5點幾6點先出去尖沙咀 → 晚餐@【鼎泰豐】→ 行尖沙咀 & 廟街 → 食糖水@佐敦【松記】→ 11:50pm睇戲《魔法天書》@華懋

Day 2
買早餐 (粥、炒麵 & 炸兩) → 食完早餐就搭天星小輪去中環 → 下午茶@【蘭芳園】→ 上半山四圍行 → 行o左去上環 → 再返中環搵檸蜜脆脆@【勝香園】(搵o左好耐先搵到，不過冇開) → 搭船返尖沙咀 → 晚餐@尖東【巴西燒烤】

哩日買早餐好慘，我要2碗白粥、1份炒麵同1份炸兩，點知買完返去打開見到竟然2份都係炒麵，於是就要行多轉返去換...
去到同佢地講，佢地仲要唔信!!!好彩我2盒都帶埋去咋!!!換完之後，一句"唔好意思"都冇...
晏晝心情就好返，因為去到【蘭芳圍】終於都有開喇~~
但食檸蜜脆脆o個間【勝香園】就冇開喇...我地仲搵o左好耐o添呀...真係行到腳都斷呀!

Day 3
食早餐 → 行尖沙咀 → 小食葡撻@【澳門茶餐廳】→ 行尖沙咀【1881廣場】→ 下午茶@【Pacific Coffee】 → 晚餐@佐敦大排檔with Frankie & Sammi → 宵夜"復活節蛋糕"

由於我地太晏出去，所以Frankie & Sammi已經入o左長洲，冇得join埋佢地喇...
不過就約o左佢地食晚飯，原本諗住入去join佢地食，不過佢地會返出o黎食喎~~
所以我同Kenneth就o係尖沙咀等佢地~
會合o左佢地之後，我地就去【妹記】，點知冇開呀!!
最後我地就轉移陣地，去o左佐敦大排檔食~~
d o野食都幾好味呀!!^^

Day 4
飲茶@尖東【御苑皇宴】→ 搭巴士到機場 → 熊館@二號客運大樓5樓 → 行機場商店@二號客運大樓5樓 → 搭巴士到葵芳 → 晚餐@葵芳

【御苑皇宴】d o野都幾好食，尤其係隻雞同炒飯。
佢地招呼仲好好o添!!就算只係飲茶都不停咁同我地換碟 (因為有雞骨)...
見我地食炒飯，又另外攞碗俾我地(即係一隻食點心用，一隻食炒飯用)，仲幫我地分埋...
最精緻就係杞子桂花糕~竟然係2條小錦鯉!!真係好得意呀!! (不過就略嫌太甜)

本來今日冇諗住去邊o架...
飲完茶，就漫無目的咁行o左去佐敦...點知就落起大雨，一路落都冇停過...
唔知點好o既情況下，我地見到架去機場o既巴士...
諗住避避雨，又可以遊下車河~~
不過o係機場落車時，就發生o左一件好驚險o既事...
我落巴士o既時候冇留意路面情況就衝落車，點知有個巴士站長喝住我...
我望一望，原來有架巴士o係我左邊方向駛埋o黎...
於是我就企定唔郁...
之後佢o係我面前駛過...我塊面同佢車身只有10cm左右距離...
當架車經過之後，我就俾3條友鬧...
第一個，巴士站長；第二個，差d撞死我o個個巴士司機；第三個，Kenneth。
之後就俾Kenneth警告：以後o係室外地方，唔准一個人行o左去，同埋唔准四圍走...=.=
佢話一係就買條BB帶綁住我喎...
之後佢就問我驚唔驚，我話唔驚；其實而家諗返...都係唔驚喎...哈哈^^

另外，仲俾我地發現o左二號客運大樓5樓有個Teddy Bears o既展覽呀!!
不過就搵o左好耐先搵到二號客運大樓o係邊囉...