2009年的第一件囍事『林張聯婚』

今年o既第一件囍事就係──

1月3日『林張聯婚』@九龍麗東酒店【桃苑海鮮酒家】

尋日係"老張"(而家應該要改口叫"林太/林師奶"喇...)o既大囍日子呀^^恭喜恭喜~~
前一晚陪佢攞衫、買玩遊戲同晚宴用o既濕碎o野...
返到屋企再搞下哩樣搞下o個樣，結果2:30am先瞓...zzzZZZ
第二朝(即尋日)要6:30-7:00am去到酒店，於是我就將鬧鐘較o左5:30am起身...
但係...都係瞓過頭...u_u
一起身已經6:40am喇...嘩...好驚呀!!!!
於是就梗係拿拿聲出門口，仲狂奔去的士站啦...
(好耐都冇試過著住對咁高o既高踭鞋(我諗有2吋至2吋半)狂奔喇...哈哈^^覺得自己好勁呀!!!)
司機見我由老遠咁樣狂奔上的士，都忍唔住問我係咪瞓過頭...真係樣衰...
好彩去到都係7點左右，冇因為咁樣而誤事咋...

仲有就係，有一個接新娘時玩o既遊戲，真係唔講唔得~~
就係我地用o左5條紅繩，分別綁住唔同o既物件，包括：用完o既廁紙筒、玫瑰花、即棄拖鞋、女性剃刀、當然唔少得o既就係"新娘子"啦~
之後就要俾新郎抽1條，抽中邊樣物件就要親吻o個件物件一下...
直至抽到綁住新娘o個條紅繩為止，咁先可以抱得美人歸~~
結果...新郎竟然第1條就抽中綁住新娘o個條紅繩喇...真係好犀利...
唔通真係好似"月老"咁有條紅繩綁住佢地o既?!我諗哩d就係上天安排o既緣份喇~~

之後就係一d傳統o既斟茶、出門、去男家斟茶o既儀式...
跟住返去擺酒o既地方，d兄弟姊妹就開始忙、忙、忙喇...
一路到晚宴結束，大家收拾好所有o野之後都離開...
而我就跟到老張最後，希望可以幫輕下佢地，執頭執尾咁樣啦...
(其實全日我都幫唔到d咩手...)

雖然今日真係好攰好攰!!
不過見到佢地終於結束十幾年o既愛情長跑，步入生人另一個階段...真係覺得好開心^^
希望可以幫佢地做d o野...(雖然可能咩都幫唔到...因為真係微不足道)
所以辛苦d都係值得o既~~

o係度再一次恭喜佢地~
同埋祝佢地恩恩愛愛&甜甜蜜蜜，仲有梗係要長長久久啦~

※仲有要多謝老張將佢個靚靚絲花花球送o左俾我~~
  (希望我都會好似佢咁幸福啦~~哈哈^^)