Sally & Rex Wedding 『囍』

今日係我識o左十幾年o既好朋友Sally o既大日子，o係哩度我要祝Sally & Rex「日日都開開心心，恩恩愛愛，永遠都咁愛對方!!」

 

今日所有o既儀式(包括：接新娘、到男家斟茶、回門、註冊同擺酒)都o係《美麗華酒店》舉行，雖然已經少o左好多舟車勞頓，不過大家都好疲倦，但係每一個兄弟姊妹都仍然好落力，希望盡力令哩個婚禮盡善盡美。

 

*:.｡.✿･* ﾟ我的感覺ﾟ*･✿.｡.:*

其實我真係冇諗過Sally會搵我做伴娘o架，因為o係佢身邊有好多朋友，而且近哩幾年由於工作關係，大家都各有各忙，甚少聯絡，真係諗都冇諗到會輪到我，所以佢上年同我講今年會結婚並邀請我做佢伴娘o既時候，我就二話不說咁應承o左。當時真係好開心，因為唔單只有機會參與，而且仲係做伴娘o添...婚禮完結之後，Sally同我講當初佢都驚我唔會做佢伴娘，因為所有o既兄弟姊妹我都唔認識，但係我真係好想佢知道十幾年好朋友o既地位，係冇人可以代替，而且係冇o野可以改變o既，所以只要佢開聲，我就一定會應承!

 

我覺得新娘子係一個好幸福o既人，因為有好錫佢o既屋企人、又有一班好錫佢o既兄弟姊妹，最重要o既梗係有一個好好好錫佢o既老公啦~

 

當一對新人o係所有親朋好友面前完成o左註冊儀式o既時候，我真係覺得好感動，聽到新娘子講自己o既感受時，我真係已經忍唔住自己o既眼淚喇...一個識o左十幾年o既好朋友出嫁，原來心情真係非筆墨所能形容o架...佢開心我都開心；佢唔開心我都唔開心；佢辛苦到嘔o既時候，我個心都好難受，但係我唯一可以做o既只係o係佢嘔o既時候幫佢掃背，減輕佢o既不適...

 

經過o左一個咁難忘o既晚上，新郎同新娘日後一定過得幸福快樂!

 

✿◕‿◕✿ 新娘今日真係好靚呀~~好羨慕呀!!